星期５晚都係忍唔住，捱夜寫左兩封信俾歡歡，寫到成６點。跟住就訓覺，我都幾驚起唔到身去教會大旅行。好彩鉅華早到，佢８點半就到左就急ｃａｌｌ我出去同佢食早餐，又好彩我聽到電話響，咁我先至唔使遲。去左盈豐樓下食早餐，都唔係咁好食咋！
去百佳跟住上媚姨屋企羅蕃薯，之後就落去巴士站等車喇！去到都有唔少人，有好多都唔係平時返開教會添，咁樣幾好，咁樣可以令我地教會出ｄ。上到巴士我坐係最尾個排，我都冇同阿明坐，唔知呢？好似同佢多左少少隔膜。我同阿邦佢地坐啦！不過其實同阿邦我都唔知可以講ｄ乜！我都同自己坐冇咩分別。
係天水圍上埋車，承恩佢地同阿邦可以玩下，咁我先可以放心休息，我真係幾累先！不過有時我都會同佢地講下野既，畢竟我係唔應該訓覺，係我自己癲倒左ｄ時間。
去左涌尾燒，因為個到未有人燒。個環境其實幾好，廁所都算係乾淨，又有水洗手，已經好唔錯。另外ｄ爐大部份都有樹蔭，係得我地個個遮得半邊，不過ｏｋ啦！大家都接受得到既。我係度忙呢樣忙個樣個時，係得阿駿主動幫我，其他佢地都係好自顧自咁玩緊。
ｒｕｂｙ帶敬拜，俾我感覺佢準備都係唔足夠，不過比起我黎講已經準備左多好多喇！講真應該係大家有責任既，因為呢個應該係同心圈帶既。都唔明點解阿明練左歌但係就冇和唱。佢同盼恩好似成日都一齊，不過好好彩我而家係冇呷醋，我記得曾幾何時我有呷過。
燒燒下野食，唔知承恩定望祈話阿邦喊，我都不以為然問阿邦你喊咩，點知見到佢真係喊緊。咁我當然地緊張啦！我就去問佢做咩鬼，但係佢唔肯講，淨係喊，跟住佢就去廁所喇！跟住出返黎我又問佢啦！佢又開始喊，佢似乎受左好大委屈，佢又頂唔順又去左廁所喊。我去問下佢地邊個同阿邦講過野整到佢喊，冇人話同佢講過野。
我見到佢成日去廁所又咁委屈唔講得，我就驚唔知係唔係關於廁所可能冇閂門俾人開左喇！佢出到黎都仲係唔肯講，佩芳過黎就話阿邦喊乜鬼個ｄ啦！我就覺得咁樣話阿邦唔好，因為佢都未知阿邦做咩喊，可能真係大件事架嘛！同埋阿邦喊得，對佢黎講已經係一件好大既事啦！我叫佢同媽咪講出黎啦！佢就真係肯講喇！媽咪同個仔既感情係大好多既，呢個又真係好自然。原來係因為望祈佢地成日取笑話阿邦同埋佢既女同學一齊，阿邦好唔鐘意不過佢地就係咁講係咁講。
佢媽咪就車，咁少事。不過我知道對佢黎講係佢唔能夠接受既。好多少朋友好似華華、俊琳俊禧都關心咁問點解景邦哥哥喊既，我覺得呢ｄ小朋友都好有關懷既心。我同阿邦表明明白佢既感受因為我都經歷過，係唔開心既。亦都俾左個想法佢就係人唔知道但係神知道，所以唔洗理佢地講咩。又講佢地係想同你講下笑，佢地都唔知道咁樣講會傷害你。我叫佢下次要表達出黎同佢地講你係唔鐘意佢地咁講既，因為即使喊佢地都唔會知道你係因為咩而喊。又叫佢諗下如果佢地唔係講你既時候大家係咪都好ｆｄ。最重要係同佢講唔好怕俾人講就唔同ｄ女仔玩，因為神知道你地係冇野既。我諗咁樣既安慰同埋教導係幫到佢既。不過似乎有ｄ人會講得咁樣太縱容阿邦喊，又有ｄ人覺得係應該俾ｄ時間景邦靜下既。景邦叫我去燒野食，咁我就去左喇。不過佢地以為係因為阿明叫所以我燒，不過我都冇澄清，因為太小事喇！
去到個爐到就同佢地講叫佢地唔好再話阿邦，望祈話佢冇，我就叫佢諗清楚自己講過ｄ咩喇！不過其實我都冇好清楚咁講係咩事，因為阿邦會聽到。不過阿明就覺得我好針對阿望祈。鉅華就覺得講者冇心聽者有意。我諗盼恩會覺得我處理得唔係咁好。我之後就離開左個爐，我去左同職青佢地燒同埋相交。不過照理我係唔應該離開自己個組去第２組既，不過我都係相信盼恩佢曾經有一句說話佢叫我去第２個爐燒，我相信佢係因為覺得我係當時既處境唔適宜留低，我又覺得冇咩所謂既。
約翰組佢地燒到厭就周圍玩喇！不過佢地冇咩野可以玩，就成日話要去踩單車要去水霸。好彩佢地都問過我先，我就同佢地講今日係大旅行，佢地要去既話要佢地媽咪爸爸旅行之後同佢地一齊去，即係話俾佢地知：唔得！不過我明白佢地好想去睇下玩下離開一下，我就諗不如去新娘潭睇下，畢竟我地今次旅行係話去新娘潭既。我帶佢地又邀請埋同心圈職青個ｄ一齊去，一行都成１６人，幾好先！行左成１０多分鐘先上到去，而個新娘潭同我地上次探路個日差好遠好遠，今日冇咩得水。佢地亦都覺得原來就係咁，不過我相信佢地都開心既，因為始終佢地都睇過而且佢地都消磨左唔少時間。望祈卻係係度整ｄ螞蟻，又用水淋佢地，我覺得咁樣真係唔好。我唔知牧師係點樣教佢，我驚如果牧師係度既話會同佢一齊咁整螞蟻添！我真係唔係好敢話望祈，因為我好專重佢家姐同埋牧師，我覺得佢地會教佢。
去完旅行，我係太和落左車，劍光就帶我去搭車去大埔火車站喇！我打唔到俾大舊或者阿貞，佢地電話都冇人聽，我又冇咩野做，咁我就搭火車去羅湖喇！去到粉嶺先打到俾佢地，佢地先仲係係荃灣。佢地知道我去緊羅湖就即刻搭車出黎喇！不過佢地話經黃崗都要一個鐘。我過左關，實際上都唔知要係邊度等佢地，係地鐵買票處等左陣，唔係好對路又係出境去火車站個度等左陣，跟住問個個公安既物體佢叫我上去等。上去先知原來就係個度，離境大堂，咁我都等左成７個字佢地先到架！不過見到佢地已經好好喇！我都預左個心見佢地唔到就自己落返去。
好耐冇見大舊喇！佢都冇咩變姐。我地搭地鐵去左東門，佢地話東門就好似香港既旺角咁。去到覺得自己好似大鄉里咁呀！個度真係好旺！佢地帶左我去睇衫，我其實都冇咩興趣，因為個度ｄ野都唔會係真，好似買左係香港都唔會著咁。不過佢地由其大舊都好有興趣，佢地成日都係係度買衫架！我都真係受到好大既文化衝擊，佢地上到黎真係好似大佬咁款，我真係唔識！其實ｄ野都唔係話平，同香港真係話得上係差唔多。
行完街就去左買野飲喇！ｄ珍珠奶茶雖然係２個半一杯，不過真係唔係咁好飲！家樂要去搵阿貞，我就同大舊去洗下腳喇！幾正！有得沖涼，我不知幾想沖涼先！沖完個涼仲有得刷埋牙，真係搞野！出去就坐底搵人按腳喇！點左杯凍檸茶，冇甜味既。大舊杯咸檸七仲搞野，係檸七加鹽！哈！不過佢杯野仲好飲過我個杯！我同大舊就吹水，都係傾計架！佢講左佢同衛穎詩ｄ野我聽，佢已經對愛情死左個心喇！佢覺得點解付出咁多，但係最尾得個桔！佢話佢而家都會拍下散拖喎！不過佢話佢都已經冇諗住結婚啦！我都有講下我同ｒｕｂｙ ｄ野佢知，不過我講得好少，因為大舊係咁講，佢似乎好想講。我地傾傾下家樂阿貞就黎左喇！我同大舊都冇再講喇！
我地按完腳就去食野。兩個人按腳都係５０蚊咋！都真係好抵！ｄ腳底按摩真係有料到，按左腳，我隻右腳同埋ｄ內臟都有反應架！不過我諗我身體都幾好，佢問我痛唔痛個時我都唔覺得痛！
去食野，去左ｄ好似海鮮酒家既野。食扇貝我地４個人食左成６０隻！因為真係好好味呀！又食左雞軟骨，一般姐！又少。另外食左一斤蝦，係醉蝦，生食架！都ｏｋ好味既！不過嫌有ｄ澀利。又有啤酒又有汽水，不知幾正！
食完佢地就幫我搵間骨場過晚喇！見到大哥哥好想我泵間好野！原本話想去皇室堡既，大舊話呢間ｄ女仔全部都好靚喎！不過因為冇單人房所以就冇去。都唔平架，要成＄１６８。去左另一間，春風城，＄１０３兩個鐘，不過過晚就一定要泵４個鐘，即係都＄２０６喇！大舊俾埋錢我，陪我入去之後佢地就走去落ｄ喇！我其實真係有ｄ拗，我都唔知應該要點，話曬都第１次去泵骨。不過以大舊同我按腳既經驗大概都識少少既。
我先先係個大按摩池浸下，坐係個噴水既按摩椅上面都唔覺得有咩咁爽，不過都幾好玩既。浸左一陣就學人沖涼喇！其實我都幾想去蒸下，只係唔識所以廢事！之後就去換衫，又係著紙底褲。去大堂坐左陣，咩都唔識都幾面懵。叫人黎按腳，等左我成廿幾分鐘都冇人黎。跟住黎左個肥既，我以為係靚女添！幾想話換人，不過都係算。按左成粒鐘，按完個時都成２點３喇！就去揀女仔，有個ｍｏｎ俾我禁用黎揀既。不過ｄ女仔都唔係話好靚，有ｄｏｋ既都要等半個鐘至一個鐘。有ｄ都唔使等既，不過個時諗樣衰既不如唔泵，所以都揀左個幾靚既，係房到就等左半粒鐘喇！係間房到睇電視其實都幾無聊架！半個鐘之後就有個著住和服既女仔係門口喇！佢入黎，我心裏面幾想車，不過佢又唔係話樣衰，只係小小肥，而且同張相差得遠姐。
佢由腳開始按，我就攤係度。我同佢傾計，問佢第一次做呢種工時覺唔覺得尷尬，佢話覺得，不過耐左就習慣左喇！我問佢點解做呢種工，佢話因為屋企窮。我問佢讀書讀到咩程度，佢話讀左一年，不過因為冇錢所以冇讀就出左黎做野喇！我問佢屋企有幾多人，佢話４個。佢鄉下係湖南；佢而家一個人住係皇室堡上面；佢一個月打２００幾蚊電話費同屋企人傾計，每日５分鐘；佢好鐘意畫畫；佢讀書既時候拍過拖，而家就冇拍；佢鐘意ｄ大隻同埋高既男仔，因為好攬ｄ；佢話如果佢係男仔既話鐘意ｄ有ｄ肉既女仔因為好攬ｄ；佢話頭先個個客成４個鐘都係度自言自語，佢就淨係係度哦；佢話隻手好累；佢話佢好好好好好掛住屋企人；佢話佢做左１年半野；佢話佢聽日就要寄錢返屋企；佢話佢要賺錢，賺左錢就可以學野，佢唔答我學咩；佢話我係咁問佢野唔煩，仲好新鮮添，佢話冇客人係咁；佢話好多好似我咁既年紀既男仔黎泵骨既；佢話佢表妹個奶奶都係信基督教既，仲話可以見到耶穌既像添；佢話佢成日都唱歌，好恐怖；又話佢表妹學左都係好似佢咁成日唱歌；佢問我係唔係，我就話係，仲唱出黎添，佢話好恐怖好難聽，我就解釋話因為我地開心所以成日唱歌；佢話同ｄ同事好ｆｄ；佢話佢以前男朋友打藍球好勁；佢話佢有少少掛住佢；佢話我隻腳ｄ肌肉好實；佢同我做大動作既時候好多動作都做唔到，佢話我太高；佢話佢都識打藍球；佢話夠鐘囉！
其實我好開心識到呢個朋友，雖然我地真係唔應該會再有機會見，而且我連佢既名我都唔知，不過我好開心呢個鐘可以同佢咁ｆｄ咁好玩，雖然呢個可能係佢既工作需要，雖然佢係肥肥地，但係佢既故事令我真係好同情。佢係唯一一個我俾ｔｉｐｓ好自願既一個。佢走左之後我就一個人訓覺喇！７點訓醒左，想話埋單架啦不過佢話我仲有一個鐘未泵，咁我就諗住泵埋佢喇！落去揀女仔個時大舊佢地就上黎喇！不過因為佢地唔可以等我成粒因為要ｃｈａｒｇｅ佢地，所以佢地就走先喇！之後揀左個女仔，張相係ｏｋ既，不過上到黎又係另一回事。唔係話好核突，不過都唔係話靚囉。而且唔知係因為咩，我都冇太多既興趣同佢傾計喇！講左好少野，我都係專心俾佢泵。我有少少後悔冇搵返之前個個。
泵完我就沖涼走喇！不過等個架去羅湖既車都成半個鐘！返到教會成１１點添！而家，我都仲有ｄ掛住個個地方，我覺得我被薰陶左一ｄ。
