我是一個懶惰的人。
我通常也是懶得就懶，係屋企係咁，係讀書時候係咁，係事奉係咁，只有玩既時候唔係咁。
係屋企我唔做家務，只係有時心情好先做下；通常係屋企都只係玩電腦，連同屋企人講野都好少。
我細個讀書既時候都幾勤力既，不過愈黎愈懶，愈黎愈唔鐘意用腦；不過考試前就會好努力咁溫書，仲會怪之前冇平日都溫書。
事奉上面我都做唔到好好準備教才同埋係個腦到諗一次個過程，次次都係到個時先自由發揮。
去玩約左人既時候有時候都會懶而唔想應約，不過大部分唔應約都係因為冇錢。
不過如果心情好，以上既懶都可以去除，可以變得好勤力；如果有人同我一齊做，我又會可以好勤力同埋好用心，所以我諗我係一個幾依賴人既人，我亦都會係一個好飄忽既人。

我唔係一個守信用既人。
我經常會唔考慮清楚自己既限制就應承人地既要求。因為我覺得幫到人既我做到既我一定幫，所以我做到個樣野我就會應承；不過好多時我既時間、金錢、同埋知識都未必真係可以應付到應承左人地既野，即使係約人食飯，我都可能因為要做第二樣野而失約，又或者會因為錢唔夠用而失約；每次我都會覺得好無奈。我以前都好注重人地應承過我既野，不過因為阿媽講既佢做唔到，自己講既野自己又做唔到，開始覺得有好多野係控制唔到，所以唔再重視，同埋自己都唔想比失望既心情影響而唔開心。

我好叻諗野，不過唔叻做。
我由細個就已經係成日諗野既人。我細個會諗好多天馬行空既野，又會好陶醉於自己既幻想世界，亦都會好想我所諗既野會成真；小學三年級讀左一課書講發明大王愛迪生，話佢發明左三千樣野，於是我就好羨慕佢，好想好似佢咁，不過自己卻從來都冇話諗到既野就將佢做出黎，反而好似諗完就完咁樣。對於好多既野我都可以諗得好多好深同埋好特別，通常都係冇咩人諗過既野，但係自己當嘗試去做既時候發現面對問題就會停步，唔知點做，就會唔做唔試。不過矛盾既係自己好想可以自己親手做出自己諗既野，於是經常好矛盾好辛苦。

我會以貌取人。
我一直都覺得樣係天生既，亦都代表左有d野係改變唔到既。就好似天生靚既人同埋後天化妝打扮既人係唔同既，我只會欣賞天生靚既人。我好有自己對靚既標準，我會覺得靚既野先至值得珍惜既，我會覺得女仔瘦同埋高先至靚，我會覺得外表靚就已經代表係一個上天特別愛顧既人。我會比較鐘意同靚既人做朋友，我會覺得咁先係自己同類型既人。

我經常羨慕人，但付出時間心機既時候又好易放棄。
我成日都會見到人地好叻既地方，我會好欣賞，而且自己好易會好想好似佢地咁叻，於是就會去嘗試，因此自己就會有好多好多想做到既野，但係自己又冇咁多時間、金錢去學，同埋自己又冇心機去專心一件事，每樣做好少少，於是一事無成，又經常羨慕返。