今日成點半先起身，不過今日係難得既ｄａｙ　ｏｆｆ，所以都冇咩所謂啦。起身都冇食野上左網一陣再沖埋個涼就出門口去可立教補習ｌｕ。搭８先出門口，等左２個字巴士，搭１１先上車，不過搭半就到黃大仙，都唔錯！

去到都算係準時啦！佢地班野見到我都好開心咁款，不過今日我係要俾下馬威既一日，佢地唔知就梗係開心啦！遲ｄ就知唔係講笑喇！ｌｏｃｋ完書接佢地班野過班房，佢地係個課室門口已經好嘈，我就要求佢地要安靜，不過佢地唔理我。唔緊要既，我話佢地唔安靜就唔俾佢地入課室，佢地都係理所當然咁ｉｇｎｏｒｅ我，仲叫我快ｄ俾佢地入去。我企得好硬，雖然仲有人係度嘈，不過我都耐心咁等。終於有人出聲叫佢地唔好嘈喇！我等佢地真係完全唔出聲我先開門，第一個回合係我嬴左！成個過程我諗有１０分鐘。

入到去佢地都係係度嘈，的而且確我知呢場丈係有排打既。我俾佢地嘈下，我就準備我ｄ野。跟住就開始叫佢地羅ｄ野出黎，今日我都ｆｅｅｌ到我既口吻係俾以前都認真既。今日教３位數乘２位數，不過我知佢地應該都係識計架啦！所以我都冇點正式教，我直頭叫佢地做數。好明顯，葉泓軒同曾詠豪係識既，其他就難講ｄ。跟住係黑板教佢地計左次就開始我個遊戲，星球大戰喇！一人擁有一個星球，有地球啦！木星啦！等等啦！佢地都幾開心，仲係度揀邊個星球係佢地既。不過其實邊個星球都唔係最重要，因為一陣輸左都係人地架啦！

個遊戲係咁既，一人一個星球啦！跟住就會編定由邊個打邊個。攻人地既一方就寫出一個３位數，被打既一方就寫個兩位數，跟住就鬥快計，邊個計得又快又準就可以羅埋人地個星球喇！佢地不知玩得幾開心，都發揮到佢地個潛能添！真係好難見佢地計得咁投入同埋有效率！呢個遊戲算係好成功啦！我話玩完佢地都仲話要計！

今日葉泓軒好曳，其實不嬲都係咁架啦！不過由而家開始我係唔會再縱容同埋容許架啦！我今日罰左佢坐係最後既自閉位，佢開頸唔肯，不過我認真叫左佢幾聲佢就坐喇！佢有好幾次都作反，不過我都好認真唔係同佢玩咁同佢講，佢都好趣，畢竟佢都係叻仔黎既，佢都識睇面色既。總算俾左個下馬威佢啦！不過最好就係佢地自己識做，咁我就唔洗咁樣對佢地啦！

今日何銘恆都唔知做咩，好似好唔開心，悶悶不樂咁！佢就好鐘意聊人玩，睇到佢真係好無心向學。我好認真同埋溫柔咁同佢講左幾句。同佢講佢都６年級，下年你要入中學唔係好似翜地咁４年級。佢話佢自己冇得救架啦咁！我話點會呢！我好想幫下佢，同佢傾下，俾ｄ信心佢。不過補習班既時間就係唔到我放咁多時間落去。

高子晴今日好乖喎！我都真係忍唔住要讚下佢。仲俾左６個印仔佢添！佢今日禮貌態度做功課既效率都好好，讚完佢我覺今日搵到我既愛將喇！做老師，有一個愛將原來真係咁緊要既！

曾麗詩，對住我真係好冇禮貌！點解會咁架？！講真我幾鐘意呢個小朋友，雖然只係合眼緣，不過佢既表現真係扣曬分囉！我點先可以令到佢知道功課係要認真做架呢？人地又係女仔，佢又係，點解人地可以咁勤力，佢就咁懶呢？

曾詠豪呢隻仔幾好既幾正直既，不過有時候係奸少少會隱瞞對自己冇利既野姐。

彭志健，係一個好唔認真既仔，不過我對住佢就會特別既認真，真係非常之認真！我可以講係鬧佢架！不過我有ｐｏｉｎｔ先鬧架咋！可能就係因為佢做錯既野都係我有ｐｏｉｎｔ可以鬧架啦！所以我特別認真。

馮文豪，佢今日終於做到似返一個導師啦！真係幾開心同埋滿足！不枉我上個星期練習左咁多次同埋咁認真去改變同埋思考！感謝主！冇你我冇呢個咁大既信心！