今日１１點起左身，不過今朝成８點幾９點先訓。起身就搞掂個昱姐個ｐｏｗｅｒｐｏｉｎｔ再沖返個涼就出門口去俾隻碟阿ｊｏｅ喇！跟住打俾燕花點知佢又聽喎而佢又得閒返教會喎！就約左佢點半跟住買埋個蛋糕就返黎教會喇！

返到去盼恩教ｂ女琴，我地就入左同工房傾計喇！唔知佢地覺唔覺得怪怪地呢？跟住開組啦！阿駿個ｇａｍｅ，ｏｋ啦！係真係悶小小既，點解會有咁既ｇａｍｅ架？！之後浩然帶敬拜，真係冇咩誠意囉！真係唔鐘意佢咁，不過點教返正佢就真係我既責任同埋我既問題喇。我自己帶活用聖經都帶得好差好差呀！自己冇睇聖經卻叫人睇聖經，會有幾多說服力丫！雄華同眉花幾悶先！燕花就冇聽到因為佢早走左。

自己小組，ｇａｍｅ非常一般，敬拜不能投入。主題係愛，ｏｋ既！大家都有講下野ｓｈａｒｅ下咁！其實ｒｕｂｙ帶得都唔錯既！完左為阿明祈禱。跟住同清姐傾計，傾完就返屋企喇！

返到屋企冇咩做，因為真係有ｄ無聊，咁就ｉｎｓｔａｌｌ左隻ｓｐｉｄｅｒｍａｎ２黎打下喇！又真係好好玩喎！勁！諗諗下真係個個都出曬街玩，自己又真係好似無聊ｄ咁！不過又冇咩孤獨既感覺喎！呢個係一個進步！

打到１２點幾就醒起打俾歡歡講聲中秋節快樂先！打左，真係有人聽喎！哈！佢係房度聽緊歌，佢話４點就會同以前小學ｄ同學仔行山喇！又問我同佢傾唔傾到４個鐘，好彩我都仲有分鐘姐！我地就傾啦！佢問點解琳琳咁耐都冇打俾佢，咁係因為佢過左英國啦嘛！不過其實點會有人好似我咁打咁多電話先得架！呢度係有ｄ破綻！

佢話佢唔鐘意食月餅。不過我知係一ｄ安慰自己既說話。佢話屋企有兩盒月餅，不過你媽咪用黎送俾人。佢話佢幾嬲，因為自己都冇得食點解仲要送俾人喎？！我話我以前細個都係咁諗，而且我大個左知道點解，不過我就安慰佢話可能係要送禮俾ｄ局長。佢話屋企仲有兩枝紅酒，佢以為買俾佢飲點知原來係用黎送禮，佢幾想打爛佢先！佢話佢得唔到既野佢都唔要人地得到喎！

佢講俾我知今日佢俾媽咪打呀！佢話因為佢同阿媽嘈交喎。事緣係佢幫阿媽由阿爺度羅左個大冬瓜同埋其他野好重好重羅返屋企，一個人搭成來回２個鐘車，行一陣又抖一陣，幾辛苦。佢屋企係８樓，佢仲要行８層樓梯先上到去！幾辛苦先！點知拍左幾次門幾大力都冇人應門，跟住佢就去左７樓等。之後又上去拍門，點知原來有人，咁佢就好嬲喇！佢就話媽咪幾懶先！又話阿媽細佬都唔幫手！佢話媽咪講唔過佢跟住就羅衣架打佢喇！佢話佢ｄ衣架係用鐵做架！又冇膠包住喎！佢答我佢阿媽打佢小腿架！我都有ｄｄ心痛，不過知道我係冇咩資格去干涉同埋理陳主任點教女，不過我都係安慰佢問佢有冇事仲痛唔痛。

歡歡又問我我細個個時媽咪對我好唔好，我答一般般啦！我記得媽咪都有唔知一次定兩次打過我架！講真，我淨係有俾媽咪打既印象但完全唔記得佢為咩打我囉！所以呢個教導方法唔係咁好！歡歡話佢幾煩先！咩都煩呀！又話細個個時幾好幾好咁。好明顯呢個係佢對於而家既不滿，佢似乎對屋企真係有一種反感，好彩既係佢對神有一種絕對既信賴姐！

佢同我講最近有好多人打俾佢煩佢，有個成３０歲，話歡歡細個既時候見過佢喎！仲想約歡歡去街，歡歡話都唔記得佢係邊個，又話唔知點解佢地會知佢手提。我諗應該係係佢以前同佢ｄｆｄ出去玩既時候識架喇！佢以前或者而家點樣出去玩同埋玩ｄ咩我真係有ｄ擔心同埋好奇，講真！聽佢講既野中覺得佢出去玩就好似係同埋ｄ唔識既人ｄａｔｉｎｇ咁。咁樣好危險姐！難怪陳主任管得咁嚴既。後來佢阿爸返左黎，咁我地就收線喇！佢叫我５點９或者６點半打俾佢喎！

之後我就同阿釗執房喇！基本上係佢執，我冇咩點幫手！的而且確成屋企既男仔之中我係最懶既一個！阿釗真係好，我話想搬部電腦返房想佢執下佢就真係執，真係好細佬！之後我地成５點先訓。